صفاء الياسري ـ ماذا غير البؤس والجوع والخوف … جلب أصحاب السلطة لأطفالنا

ماذا غير البؤس والجوع والخوف … جلب أصحاب السلطة لأطفالنا

 صفاء الياسري

راجع من المنصور للبيت ساعة 12 بالليل وصلت لساحة الدلال بالاعظمية اني واسوق لكيت طفل ما يتجاوز ال١٢ سنة كاعد بالفلكة وشايل كارتونة بيها جكليت طبكت السيارة ونزلت كتلة حبيبي ساعة 12 شسوي لهل وقت كاعد بالشارع كلي اريد ابيع كتلة بس منو الراح يشتري منك الشارع فارغ روح وباجر بالنهار اطلع كلي اخاف العيد يخلص كتلة واذا خلص العيد الناس ما يخلصون باجر وعكبة وكل يوم الله راح يرزقك

كلي عمو ما ارجع كتله ليش فهمني اعتبرني صديقك ونسولف كلي عمو اريد اشتري هدوم العيد لاختي واخاف يخلص واني مجامع الفلوس ويروح العيد واني ممشتريلها .

كتلة انت شكد بايع اليوم كلي مشتغل ب١١ الف زين حبيبي وملابس اختك شكد كلي ١٠ الالاف كتلة اي مطلعهن هنا ابتسم وكلي عمو اني كل يوم لازم اطلع ١٥ الف لايجار البيت وبعدلي ٤ الالاف حتى اكمل الايجار كتلة زين اني راح ادفعلك حصة الايجار مال اليوم وباجر وخلي فلوسك هاي ويه شغل باجر تشتري بيهن ملابس لاختك اتفقنا؟

كلي عمو ما اقبل احد يصرف علينه! كتلة زين اعتبرني اخوك ومن صرت اخوك يعني اختك الصغيرونة صارت اختي الصغيرونة كلي لا انت مو صدك اخوية واني لو عندي اخ بعمرك مجان احير كتلة زين والحل تبقة بالشارع ساعة12!؟

كلي عمو روح اني ما اقبل احد يصرف على اختي اني موجود .. كتلة زين عندي فكرة كلي شنو كتلة اني احب الجكليت واريد اشتري كل الجكليت مالتك اتفقنا؟ كلي اي ميخالف شو حط كارتونتة بالكاع وكعد يحسب بالجكليت كتله شدتسوي؟ كلي اني ابيع ٢ بربع حتى اكلك شكد فلوسهن كتلة اني اشتريهن منك ب٢٥ بلا متحسب كلي لا ما اقبل تنطيني فلوسهن اريد الصدك مو الجذب كتلة تدلل يلا احسب ماشي حسبهن طلعن ٢٠ جكليته يعني فلوسهن ٢٥٠٠ دينار

كتلة زين اني اذا نطيتك بس ٢٥٠٠ والله مراح ارتاح وازعل تقبل تزعلني؟ كلي هو منو المرتاح ( طفل عمره ما يتجاوز ال١١ وال١٢ سنة يكول منو المرتااااااح!!!)

كتلة زين لخاطر اختك خطية مو تريد ملابس تشتريلها للعيد اقبلها مني كلي عمو لا تكول على اختي خطية! كتلة اني اسف بس اني ما اروح اذا ما اشتري الجكليت مالتك بس مو ب٢٥٠٠ سكت مجاوبني وصافن كتلة شكلت شو هنا كام يبجي هالمرة شگ گلبي كتلة زين ليش تبجي كلي لان راح اقبل واني ما اريد بس حتى اختي تفرح

المهم وراها كتلة انت وين بيتكم كلي بالشعب زين شلون اتروح كلي امشي لجامع النداء واكو كيات تجي بهيج وكت موجوده ( يمشي تقريبا ٣ كيلو متر) كتلة اني اوصلك كلي لا عمو اني امشي ( عنده عزة نفس حتى بالتوصيلة!) كتلة والله على طريقي تعال يلا .. قبل وصعد او وصلتة ومن راح قسما بالله راحت روحي وياه!

وطني اخذت من عدنه كلشي وما نطيتنه كلشي

اخذت شبابنا

وعافيتنا

وراحتنا

واملنا

وحياتنا

ضحينالك وما ضحيت النه

وفينالك وما وفيت النه

اشتريناك وبعتنه

وهسه ادعي عليك مدري اندعيلك